• Nortegasek proiektu estrategiko eta berritzailea abiarazi du, energiaren sektorean erreferente bilakatzeko xedez.
• H2SAREA proiektuak gas naturala banatzeko azpiegituretan hidrogenoa modu seguruan txertatzeko aukera bultzatu nahi du, aukera teknologiko aurreratuak ikertuz.
• H2Loop ikerketa-plataformari esker, hidrogenoarekin eta hidrogenoaren eta gas naturalaren nahasketekin harremanetan dauden materialen eta osagaien joera ikertuko da.
• Nortegas hidrogenoaren garapenari eta ikerketari buruzko hainbat proiektu sustatzen ari da, energiaren sektorea deskarbonizatzeko funtsezko energia baita hidrogenoa.

Nortegasek, maila nazionalean gas naturala banatzen duen bigarren konpainiak, H2SAREA proiektua jarri du abian. Proiektu horren bidez, hidrogenoaren banaketa-arloan konpainia gidari bihurtu nahi du Nortegasek.  Hala, konpainiak hidrogenoaren balio-katerako aukera teknologikoak lantzen dituzten proiektu abangoardistak bultzatzen jarraitzen du eta horretarako, gaur egun gas naturala banatzeko dagoen azpiegiturarekin bateragarriak diren materialak, produktuak eta sistemak ikertzen ditu. Hori guztia, banaketa-sarean gero eta hidrogeno gehiago txertatzea ahalbidetzen duten eskakizun teknikoak, operatiboak, segurtasunekoak eta eraginkortasun ekonomikoarenak betez.

H2SAREAk hidrogenoaren erabilera eraginkorraren inguruko erronka energetikorik garrantzitsuenetako bat lantzen du. Gas berriztagarri hori gaur egun gas naturala banatzeko dauden sareetan txertatuta, 8.000 kilometrotik gora dituzten azpiegitura batzuk aprobetxatu ahalko lirateke Nortegasen kasuan eta horrez gain, hidrogenoak ekonomia deskarbonizatzeko palanka gisa duen funtzioa sendotzen lagunduko litzateke, etxebizitzetan zein industrian, eta baita mugikortasun-arloan ere, haien ezaugarriak direla-eta elektrifikatu ezin diren sektoreen eskaerari erantzunez.

Gas naturala banatzeko sareak blending egoera desberdinetan hidrogenoa banatzeko eraldatzea ahalbidetzen duten aukera teknologiko, ekipamendu eta osagai berriak ikertzean eta garatzean datza proiektua: hidrogenoa txertatzeko sistemak, konpresio-sistema aurreratuak, hidrogenorako espezifikoak diren finkapen adimendunen garapena, % 100ean hidrogenoa duten kasuetan zein hidrogenoaren eta gas naturalaren nahasketa aldakorretan erabiltzeko modukoak diren material eta osagai berrien ikerketa, hidrogenoa bereizteko sistema modularrak, sentsoreak, erregailuak, etab.  Azken finean, banaketa-sarea eraldatzen joateko eta gas naturalaren sarean gero eta hidrogeno nahasketa handiagoak erabiltzeko beharrezkoak diren aukera teknologikoak ezagutu eta eskaintzea da xedea, % 100ean hidrogenoa erabili ahal izan arte.

Nortegasek zuzendutako proiektu honek euskal industria-sareko enpresa garrantzitsuak biltzen dituen partzuergo bat du abiapuntu gisa: ABC Compresores, C.A.E., S.L. – FIDEGAS, H2Site, Erreka Fastening Solutions eta Orkli. Gainera, Zientzia, Teknologia eta Berrikuntzaren Euskal Sareko zentro teknologiko nagusien lankidetza du: Tecnalia eta Ikerlan. Era berean, Hidrogenoaren Zentro Nazionalaren lankidetza ere badu, maila nazionalean arlo horretako erreferentea dena.

H2SAREA proiektuak hiru urte iraungo ditu guztira. Tecnalia eta Ikerlan zentro teknologikoen instalazioetan egingo dira lehenengo ikerketa- eta garapen-lanak. H2Loop ikerketa-plataforma integratuko dute, garapen berriak probatzeko eta materialek eta osagaiek hidrogenoarekin eta hidrogenoaren eta gas naturalaren nahasketekin harremanetan daudenean duten joera aztertzeko. Lehenengo fasean, hidrogenoa % 20an txertatzearen inguruko analisia egingo da eta bigarren fasean ehuneko hori igotzen joango da, % 100ean hidrogenoa izan arte.

Ikerketa industrialerako proiektu hau garatzea ezinbestekoa da, etorkizunean hidrogenoaren ekonomiaren bilakaera eraldatzeko eman beharreko pausoa baita, gaur egun dauden segurtasun eta eraginkortasun maila berdinak bermatzeko. H2SAREAtik ateratako ondorioak funtsezkoak izango dira instituzioekin, legegileekin eta energiaren sektoreko beste konpainia batzuekin batera arautze-estrategiak eta araudiak zehazteko orduan.

Proiektu estrategiko eta integratzailea

H2SAREA proiektuak negozio- eta enplegu-aukera berriak ekarriko ditu eta hazteko potentzial handia izango du, maila nazionalean zein nazioartean. Hau bezalako proiektuei esker, enpresa-sare iraunkorragoak bultza daitezke, helburu komunekin, hala nola ingurumenean eragin positiboa izatea eta ingurumena babestearen eta ekonomia deskarbonizatzearen alde borrokatzea.

Era berean, hidrogenoaren inguruko industria garatzeak mundu mailako eragina izango du enpleguan. 2030. urterako goi-prestakuntza jasotako milioi bat pertsona inguru sektore honetan lan egiten egongo direla kalkulatu da. Euskadin, zehazki, 2050. urterako 10.000 eta 55.000 lanpostu inguru sor ditzakeela kalkulatu da.

Proiektu hau Basque Hydrogen Corridor-en parte da. Bertan, Nortegasek beste ekimen batzuk garatzen ditu, hidrogenoaren ekonomiari eta egungo azpiegituren aprobetxamenduari lotuta daudenak.

Hidrogenoaren aldeko apustu garbia

H2SAREA proiektuaz gain, Nortegasek hidrogenoari buruzko beste ikerketa- eta garapen-proiektu batzuk garatu izan ditu azken urteotan, SINATRAH proiektua adibidez, hidrogenoaren banaketarako sistema aurreratuak garatu eta ustiatzean datzana, eta baita aplikazio industrial iraunkorretan modu eraginkorrean erabiltzean ere. Siemens Engines-en eta Tecnalia zentro teknologikoaren lankidetza eta Eusko Jaurlaritzaren finantzaketa izan ditu horretarako, HAZITEK programaren bidez.

Era berean, Nortegasek, White Summit Capital, Castleton Commodities International (CCI SENER eta Bizkaia Energíarekin batera, estatu mailako lehenengo hidrogeno berdearen planta martxan jartzeko proiektua aurkeztu zuen 2020ko abenduan. Planta horrek Amorebieta-Boroako (Bizkaia) ziklo konbinatuko zentralaren azpiegitura aprobetxatuko du. Hidrogeno berdearen planta honek 20 MW-ko ahalmena izango du eta urtean 1.500 tona hidrogeno berde sortzea izango du xede, iturri berriztagarrietatik.

Horrez gain, Nortegas Duro Felguera eta Hunosarekin lanean ari da Asturiasko meatze-arroetan hidrogeno berdearen inguruko hainbat proiektu garatzeko. Gas berriztagarri hori ekoiztean, biltegiratzean, garraiatzean, gas naturalaren sarean txertatzean eta mugikortasunaren arloan erabiltzean oinarrituko dira proiektu horiek.

Mundu mailako ekonomiarako funtsezko elementu gisa kokatu da hidrogenoa. Europako Batzordeak zein Gobernuak energia-aukera iraunkor eta garbi horren aldeko apustua egin dute.

www.h2sarea.com